होनहार युवा गांजा खायो, चुरोट पियो रक्सी पियो ।
मैले नखा भने, तेरो के खाको छु भन्यो जवाफ दियो ।
आफ्ना बाउ-आमा बृद्धआश्रम मा लगेर छोडेको छोरो,
आफू बाउ बन्यो अनि बल्ल बाउ आमा सम्झियो ।
आफ्नै बाबु बाट बलात्कृत छोरी न्याय खोजिरहेछिन,
न्यायाधीश भन्छ प्रमाण पुगेन र अभियुक्त छाडियो ।
होटलको कोठा कोठा जान्छ प्रहरी अनि छापा मार्छ,
र भन्छ यौनमा लिप्त दर्जनौं जोडी पक्राउ गरियो ।
खेल्दै गरेको अबोध बालकको गाडिले ज्यान लियो,
बिडम्बना गाडिमा "सेभ द चिल्ड्रेन" लेखिएको थियो ।
रेमिट्यान्स को पोखरीमा डुबुल्की मारेको ए सरकार,
स्वागत कसरी हुन्छ ? प्रदेशी रातो बाकसमा फर्कियो ।
अशोक गौतम क्षितिज
बुटवल, रुपन्देही ।
३१ मे २०१८
0 comments:
Post a Comment